~هو ممكن ربنا يسامحنى ؟؟~

السبت أغسطس 10, 2013 3:15 pm

بسم الله الرحمن الرحيم

السلام عليكم ورحمه الله وبركاته

هــــو ربنا ممكن يسامحنى ويغفر لى كل الذنوب

الى عملتها لو تبت منها ؟؟

ده انا كنت بسمع اغانى ، وبغتاب الناس

واوقع بينهم ،، وكنت بكذب ،، وكنت بشرب

سجاير وبشرب خمره ،، وكنت بضحك على

البنات ،، وكنت بسرق ، وكنت بعلى صوتى

على ابويا وامى ، وكنت بتبلى على فلان ،

وكنت بشهد زور ، وكنت اسمع افلام اباحيه

وادخل على مواقع الانترنت الاباحيه ،

وعملت حجات ومصايب سودا ، ده انا كلى

ذنوب ومعاصى ازاى ربنا يغفر لواحد مثلى انا

مش بتاع توبه

وانا طلعت من بيتى متبرجه وكنت بلبس اللبس

الضيق وبحط العطور والبرفانات والمكياج

وووووووو ، ازاى ربنا هيغفر لواحده مثلى ،

انا هرد على اللى بيقول الكلام ده واقول

ايه اليئس الى انتوا فيه ده ؟؟

اخواتى الشيطان عاوز يحبطكم ويقفل باب

جميل جدا قدامكم وهو باب الامل فى الله

علشان تيئس من رحمه ربنا وتستمر فى

الذنوب والمعاصى ويخليك دايما فى ياس وتردد

عن التوبه

يا اخـــوتى

اوعوا تعطوا فرصه للشيطان انه يحط

الوساوس دى فى بالك اوعوا

وابشــــروا وخــدوا البشرى دى

مهما ارتكبت من ذنوب ومعاصى

مهما كانت الذنوب دى

حتى ولو كانت يا اخى كبائر

حتى لو زنيت

حتى ولو قتلت

حتى لو كـــــــفرت بالله وتبت

واندمت على كل ذنب عملته

ابشر برحمه الله عز وجل

وابشر ان الله سيقبل توبتك ويفرح بك

هو حضرتك مقراتش الايه دى ايه الامل

قل يا عبادى الذين اسرفواا على انفسهم لا

تقنطوا من رحمة الله ان الله يغفر الذنوب جميعا

انه هو الغفور الرحيم

يا الله ما ارحمك يا رب مذنبون وينسبنا ربنا

الية ويقول قل يااا عباادى

شفت اخى رحمة ربنا ؟؟

ربنا بيقولك يا من اسرفت على نفسك

والاسراف يعنى كثررررررره الذنوب

مهما اسرفت على نفسك من ذنوب

لا تياس من رحمه الله ربنا هيغفرلك كل ذنوبك

بس لو تبت اليه توبه صادقه

اقـــرا الايات دى ليطمئن قلبك ،

وهو الذي يقبل التوبة عن عباده ويعفوا عن

السيئات

ألم يعلموا أن الله هو يقبل التوبة عن عباده

إن الله لا يغفر أن يشرك به ويغفر ما دون ذلك

لمن يشاء

واقــرا احــاديث النبى صلى الله عليه وسلم

عن أبي موسى عبدالله بن قيس الأشعري رضي الله عنه عن النبي قال

ان الله تعالى يبسط يده بالليل ليتوب مسيء النهار

و يبسط يده بالنهار ليتوب مسيء الليل

حتى تطلع الشمس من مغربها

رواه مسلم

و عن أبي هريرة رضي الله عنه قال

قال رسول الله من تاب قبل أن تطلع الشمس من مغربها تاب الله عليه

رواه مسلم

عَنْ أَنَسٍ أَنَّ النَّبِىَّ صلى الله عليه وسلم قَالَ

كُلُّ ابْنِ آدَمَ خَطَّاءٌ وَخَيْرُ الْخَطَّائِينَ التَّوَّابُونَ

سنن الترمذي

شفتوا ازاى ربنا رحيم يا اخواتى ؟؟؟

يعنى اوعوا تياسوا من رحمه وعفو ربنا

والا هتكون من الضالين زى ما ربنا قال فى
القرءان

قَالَ وَمَنْ يَقْنَطُ مِنْ رَحْمَةِ رَبِّهِ إِلَّا الضَّالُّونَ

وقال تعالى

إنه إِنَّهُ لَا يَيْئَسُ مِنْ رَوْحِ اللَّهِ إِلَّا الْقَوْمُ الْكَافِرُونَ

يعنى مهما كبر ذنبك وعظم جرمك

لا تياس من رحمه الله

انت ما عليك الا ان تتوب لله عز وجل توبه

صادقه من الذنوب دى وكلك يقين وثقه فى الله

انه هيغفر ليك كل ذنوبك ومعاصيك

ومش كده وبس

خد البشرى دى كمان

ربنا هيغفر ليك كل ذنوبك ومعاصيك وهيبدلك كل الذنوب

والمعاصى حسنااااااااااااااااااااااات

تاخد الدليل ؟؟

والذين لا يدعون مع الله إلها آخر ولا يقتلون النفس التي حرم الله إلا بالحق ولا يزنون ومن يفعل ذلك يلق أثاما يضاعف له العذاب يوم القيامه ويخلد فيه مهانا

يعنى الى يعمل الذنوب دى يشرك بالله ويقتل ويزنى ربنا هيضاعف ليه العذاب ويخلد فى جهنم

الا وركـــــــــــــــزوا فى ما بعد الا

الا من تاب وآمن وعمل عملا صالحا فأولئك يبدل الله سيئاتهم حسنات وكان الله غفورا رحيما

يــــــــا اللــه شوفتوا رحمه ربنا ؟؟؟؟

يعنى يا من اسرفت على نفسك

يا من فعلت الكبائر

بل يا من كفرت بالله عز وجل

ارجع الى ربك وتب اليه توبه نصوحه

واعرف ان ربك هيفرح بيك ويغفرلك ويبدلك كل

ذنوبك حسنااااااااااات

يلا فرصه حضرتك مستنى ايه ؟؟؟

الموت بيجى فجاه بدون سبب

محدش ضامن عمره يلا بسرعه تب الى ربك

احمد ربك انه يمهلك لغايه دلوقتى

يلا قبل ما تندم فى يوم مينفعش فيه الندم

متقلش هتوب بعدين

متقولش لسه انا صغير اتمتع بعمرى شويه

ولما اكبر ابقى اصلى واصوم واعبد ربنا وابعد عن الذنوب

هو حضرتك ضامن عمرك تعيش لحظه واحده ؟؟

لا والله محدش ضامن عمره ولو ثانيه واحده

كم من شباب ماتت وهى فى ريعان شبابها

كم من اطفال ماتت ولم تكتحل اعينهم برؤيه الدنيا

الموت ميعرفش صغير ولا كبير

صحيح ولا عليل

الموت بيجى فجاه

فيلا ابدا صفحه جديده مع ربك قبل فوات الاوان

ممكن حد يقولى

طيب ازاى انا اتوب توبه نصوحا ؟؟

التوبه النصوحه ليها شرروط مهمه لازم نعرفها

اول شرط من شروط التوبه

الاقلاع عن الذنوب

يعنى نبطل نعمل الذنوب

مثلا لو كنت بتسمع اغانى تبطل تسمعها

مكنتش بتصلى تصلى

كنت بتكذب تقلع عن الكذب

يعنى تبطل الكذب

كنت تشاهد الافلام والمواقع الاباحيه تبطل الافلام دى

كنت تسرق تبطل سرقه

وهـــــكـــذا

ده اسمه الاقلاع عن الذنب

يعنى ترك الذنب

وخد بالك ترك الذنوب يكون لله

يعنى مينفعش واحد بيشرب خمر

ويقول خلاص انا تبت من شرب الخمر

ويكون هو تاب من شرب الخمر وبطل يشربها

علشان هيبته بضيع قدام الناس وهو سكران

يبقى التوبه دى مش لله

هو تاب علشان هيبته مضعش قدام الناس

ومثلا برضو يكون واحد بيسرق

يقول خلاص انا تبت من السرقه

ويكون هو بطل السرقه علشان محدش يقول عليه حرامى

مش بطل السرقه خوف من ربنا

وهــكذا

يعنى هو بطل الذنوب خوف من الناس مش من

ربنا وده مينفعش اخوتى

يبقى لازم نترك الذنوب لله

ثانى شرط من شروط التوبه

هو الندم

تندم ندم شديد على ارتكابك للذنب الفلانى

يبقى جواك ندم شديد على المعصيه والذنب

وابشر فالندم توبه

ثالث شرط من شروط التوبه

انك تقرر انك متعملش الذنب ده تانى

يعنى مثلا كنت تسمع اغانى تقول يا رب

اعاهدك انى مش هسمع اغانى تانى

وتكون صادق مع ربك مش كلام وبس وانت فى

نيتك ترجع تسمع الاغانى تانى ؟

لا ربك يعلم الصادق من الكاذب

دى شروط التوبه النصوحه

ولازم نحقق الشروط دى علشان ربنا يقبلنا ويتوب علينا

اقرا الايه دى

يَا أَيُّهَا الَّذِينَ آمَنُوا تُوبُوا إِلَى اللَّهِ تَوْبَةً نَصُوحاً عَسَى رَبُّكُمْ أَنْ يُكَفِّرَ عَنْكُمْ سَيِّئَاتِكُمْ وَيُدْخِلَكُمْ جَنَّاتٍ تَجْرِي مِنْ تَحْتِهَا الأَنْهَارُ

طيب بعد ما تبت لله توبه نصوحا

وندمت على كل ذنوبك وفتحت صفحه بيضاء مع ربك

فجاه وقعت فى الذنب مره تانى بدون قصد

يعنى عملت ذنوب تانى

فى الحاله دى اوعى تياس من رحمه ربنا

ارجع تانى وجدد التوبه لله عز وجل

اوعى تياس وتقول مفيش فايده فيا

انا بتوب وارجع تانى اعمل ذنوب

اوعـــــــى

خـــد البشرى دى

عن عبد الرحمن بن أبي عمرة عن أبي هريرة
عن النبي صلى الله عليه وسلم فيما يحكي عن ربه عز وجل قال

أذنب عبد ذنبا فقال اللهم اغفر لي ذنبي

فقال تبارك وتعالى أذنب عبدي ذنبا فعلم أن له ربا يغفر الذنب ويأخذ بالذنب فغفر له

ثم عاد فأذنب فقال أي رب اغفر لي ذنبي

فقال تبارك وتعالى عبدي أذنب ذنبا فعلم أن له ربا يغفر الذنب ويأخذ بالذنب فغفر له

ثم عاد فأذنب فقال أي رب اغفر لي ذنبي فقال تبارك وتعالى

أذنب عبدي ذنبا فعلم أن له ربا يغفر الذنب ويأخذ بالذنب

اعمل ما شئت فقد غفرت لك

قال

عبد الأعلى

لا أدري أقال في الثالثة أو الرابعة اعمل ما شئت

ايــــه رايك فى الحـــديث ده ؟؟؟؟

شفت ازاى دينا يسر ؟؟

انت اخى لو وقعت فى ذنب وذلت قدمك فى بؤره معصيه

ما عليك الا ان تجدد التوبه والاوبه لله عز وجل

واعرف ان العبد عبد والرب رب

وانا وانتم بشر ضعفاء نذنب ونتوب

والنبى قال كل بنى ادم خطاء وخير الخطاؤن التوابون

اخى فى الله اختى فى الله

الا ان الاوان ان نرجع ونتوب لله قبل فوات الاوان ؟؟

يلا الان محدش ضامن عمره يلا نتوضى ونصلى ركعتين توبه لله عزوجل

ونفتح صفحه بيضاء مع ربنــــا

وصلى اللهم على محمد وعلى اله وصحبه اجمعين

والسلام عليكم ورحمه الله وبركاته

الخميس أغسطس 22, 2013 10:48 am

الاخت / عابرة سبيل

~هو ممكن ربنا يسامحنى ؟؟~

~هو ممكن ربنا يسامحنى ؟؟~

رد: ~هو ممكن ربنا يسامحنى ؟؟~